Download Font   
Warning: mysql_result() expects parameter 2 to be long, string given in /home4/kasargod/public_html/old1.kasaragodvartha.com/admin/function.php on line 98
Last Updated on:12th December 2017 02:28:27 PM
Bookmark and Share
 
 
മൂല്യനിര്‍ണയത്തിലെ ഗ്രേഡിങ്‌ രീതികള്‍
കൊച്ചി: ബിരുദതലത്തില്‍ വിദ്യാര്‍ഥികളുടെ ഉത്തരക്കടലാസില്‍ ഇനി മാര്‍ക്ക്‌ വീഴില്ല. പകരം ഉത്തരത്തിന്റെ നിലവാരമനുസരിച്ച്‌ ഏതെങ്കിലും ലെറ്റര്‍ ഗ്രേഡാവും നല്‍കുക. ഓരോ സെമസ്‌റ്ററിന്റെയും അവസാനം ഗ്രേഡ്‌കാര്‍ഡ്‌ നല്‍കും. പ്രോഗ്രാം പൂര്‍ത്തിയാക്കുമ്പോള്‍ ഓവറോള്‍ ഗ്രേഡ്‌ കാര്‍ഡും. മൂല്യനിര്‍ണയത്തിന്‌ രണ്ടുഭാഗങ്ങളുണ്ട്‌-തുടര്‍മൂല്യനിര്‍ണയവും സെമസ്റ്റര്‍ അവസാന മൂല്യനിര്‍ണയവും. തുടര്‍ മൂല്യനിര്‍ണയത്തിന്‌ 20 ശതമാനവും എക്‌സ്റ്റേണല്‍ പരീക്ഷയ്‌ക്ക്‌ 80 ശതമാനവും മാര്‍ക്കാണിപ്പോള്‍ നല്‍കുന്നത്‌. ഇത്‌ ഇനി 25 ശതമാനവും 75 ശതമാനവുമായി മാറും. ഹാജര്‍, അസൈന്‍മെന്റ്‌, സെമിനാര്‍, ടെസ്റ്റ്‌ പേപ്പര്‍ എന്നിവ അടിസ്ഥാനമാക്കിയാണ്‌ തുടര്‍മൂല്യനിര്‍ണയം. ഇതില്‍ അറ്റന്‍ഡന്‍സ്‌, അസൈന്‍മെന്റ്‌, സെമിനാര്‍ എന്നിവയ്‌ക്ക്‌ ഒന്നുവീതവും ടെസ്റ്റ്‌പേപ്പറിന്‌ രണ്ടുമാണ്‌ 'വെയ്‌റ്റ്‌ '. ഒരു ഉത്തരത്തിന്റെ അല്ലെങ്കില്‍ മറ്റ്‌ ഘടകങ്ങളുടെ ആനുപാതികപ്രാധാന്യം വ്യക്തമാക്കുന്ന സംഖ്യയാണ്‌ 'വെയ്‌റ്റ്‌'. ഓരോന്നിനും വിദ്യാര്‍ഥികളുടെ പ്രകടനമനുസരിച്ച്‌ ഗ്രേഡും നല്‍കും. 'എ' മുതല്‍ 'ഇ' വരെയുള്ള ഗ്രേഡുകള്‍ക്ക്‌ നാലുമുതല്‍ പൂജ്യംവരെയാണ്‌ ഗ്രേഡ്‌ പോയന്റ്‌. വെയ്‌റ്റും ഗ്രേഡ്‌ പോയന്റും തമ്മില്‍ ഗുണിച്ച്‌ വെയ്‌റ്റഡ്‌ ഗ്രേഡ്‌ പോയന്റ്‌ കണക്കാക്കും. വെയ്‌റ്റഡ്‌ ഗ്രേഡ്‌ പോയന്റിനെ ആകെ വെയ്‌റ്റുകൊണ്ട്‌ ഹരിച്ചുകിട്ടുന്ന പോയന്റ്‌ ഏത്‌ ഗ്രേഡ്‌ റേഞ്ചിലാണെന്ന്‌ നോക്കി ഗ്രേഡ്‌ നല്‍കും. സമാനരീതിയില്‍ സെമസ്റ്റര്‍ അവസാനപരീക്ഷയുടെയും ഗ്രേഡ്‌ കണക്കാക്കും. ഇവിടെ നാല്‌ ഒബ്‌ജക്ടീവ്‌ ടൈപ്പ്‌ ചോദ്യങ്ങള്‍ ഉള്‍പ്പെട്ട ഗ്രൂപ്പിനും ഷോര്‍ട്ട്‌ ആന്‍സര്‍ ചോദ്യങ്ങള്‍ക്കും ഒന്നുവീതവും ചെറിയ ഉപന്യാസത്തിനും പ്രോബ്ലങ്ങള്‍ക്കും രണ്ടും വലിയ ഉപന്യാസത്തിന്‌ നാലുമാണ്‌ വെയ്‌റ്റ്‌. നിരന്തരമൂല്യനിര്‍ണയത്തിന്റെയും സെമസ്റ്റര്‍ അവസാനമൂല്യനിര്‍ണയത്തിന്റെയും ഗ്രേഡുകള്‍ ചേര്‍ത്ത്‌ ഓരോ കോഴ്‌സിന്റെയും ഗ്രേഡ്‌ കണക്കാക്കും. ഒരു കോഴ്‌സ്‌ വിജയിക്കാന്‍ 'ഡി' ഗ്രേഡെങ്കിലും ലഭിക്കണം. സെമസ്റ്ററിലെ ഓരോ കോഴ്‌സിന്റെയും ഗ്രേഡ്‌ പോയന്റും അതതിന്റെ ക്രെഡിറ്റുംതമ്മില്‍ ഗുണിച്ച്‌ ക്രെഡിറ്റ്‌ പോയന്റ്‌ നിര്‍ണയിക്കും. ആകെ ക്രെഡിറ്റ്‌പോയന്റിനെ ആകെ ക്രെഡിറ്റുകൊണ്ട്‌ ഹരിച്ച്‌ സെമസ്റ്റര്‍ ഗ്രേഡ്‌ പോയന്റ്‌ ആവറേജ്‌ (എസ്‌.ജി.പി.എ.) കണക്കാക്കും. ഒരു സെമസ്റ്റര്‍ വിജയകരമായി പൂര്‍ത്തിയാക്കാന്‍ കുറഞ്ഞത്‌ 20 ക്രെഡിറ്റും എസ്‌.ജി.പി.എ. രണ്ടും വേണം. ഒരു ബിരുദ പ്രോഗ്രാമിലെ എല്ലാ കോഴ്‌സുകള്‍ക്കുംകൂടി ലഭിച്ച ക്രെഡിറ്റ്‌ പോയന്റിനെ ആകെ ക്രെഡിറ്റുകളുടെ എണ്ണംകൊണ്ട്‌ ഹരിച്ച്‌ ക്യുമുലേറ്റീവ്‌ ഗ്രേഡ്‌ പോയന്റ്‌ ആവറേജ്‌ (സി.ജി.പി.എ.) നിര്‍ണയിക്കും. കോഴ്‌സിനും എസ്‌.ജി.പി.എയ്‌ക്കും അഞ്ച്‌ പോയന്റ്‌ സെ്‌കയില്‍ ഉപയോഗിച്ചാണ്‌ ഗ്രേഡ്‌ നല്‍കിയതെങ്കില്‍ സി.ജി.പി.എയില്‍ ഏഴ്‌ പോയന്റ്‌ സെ്‌കയില്‍ ഉപയോഗിച്ച്‌ എ പ്ലസ്‌ മുതല്‍ ഡി വരെയുള്ള ഗ്രേഡുകളാണ്‌ നല്‍കുക. പ്രോഗ്രാം വിജയകരമായി പൂര്‍ത്തിയാക്കാന്‍ സി.ജി.പി.എ. രണ്ടും സി പ്ലസ്‌ ഗ്രേഡും വേണം. സ്‌കൂള്‍തലത്തില്‍ നടപ്പാക്കിയിട്ടുള്ള അബ്‌സൊല്യൂട്ട്‌ ഗ്രേഡിങ്ങില്‍നിന്ന്‌ വ്യത്യസ്‌തമായി ഡയറക്ട്‌ ഗ്രേഡിങ്ങാണ്‌ ബിരുദതലത്തില്‍ വരുന്നത്‌. സ്‌കൂള്‍തലത്തില്‍ നിശ്ചിത റേഞ്ചിലുള്ള മാര്‍ക്കിനെ ലെറ്റര്‍ഗ്രേഡിലേക്ക്‌ മാറ്റുകയാണ്‌. ഡയറക്ട്‌ ഗ്രേഡിങ്ങില്‍ ഉത്തരക്കടലാസില്‍ മുതല്‍ ഗ്രേഡ്‌ നല്‍കിത്തുടങ്ങും. ''സ്‌കൂള്‍തലത്തില്‍ ഗ്രേഡിങ്‌നടപ്പാക്കിയത്‌ റാങ്കിനു വേണ്ടിയുള്ള മത്സരം ഒഴിവാക്കാനാണ്‌. ഉന്നതവിദ്യാഭ്യാസത്തില്‍ മൂല്യനിര്‍ണയ പ്രക്രിയയുടെ മേന്മ കൂട്ടുകയാണ്‌ ഇവിടെ ലക്ഷ്യം''-ഉന്നതവിദ്യാഭ്യാസ കൗണ്‍സില്‍ മെമ്പര്‍സെക്രട്ടറി പ്രൊഫ. തോമസ്‌ ജോസഫ്‌ പറയുന്നു. എന്നാല്‍ അധ്യാപകസമൂഹം പുതിയ രീതിയെ പെട്ടെന്ന്‌ സ്വാഗതം ചെയ്യുന്നില്ല. മൂല്യനിര്‍ണയത്തിന്‌ ഗ്രേഡിങ്‌ നടപ്പാക്കുമ്പോള്‍ അധ്യാപകര്‍ക്കുള്ള പങ്ക്‌ പ്രധാനമാണ്‌. സംസ്ഥാനത്തെ എയ്‌ഡഡ്‌ കോളേജുകളില്‍ 45 ശതമാനത്തോളം അധ്യാപകതസ്‌തിക ഒഴിഞ്ഞുകിടക്കുന്നു. ഗവ. കോളേജുകളിലും സ്ഥിതി മെച്ചമല്ല. 1998-നുശേഷം അനുവദിച്ച കോഴ്‌സുകള്‍ ഇതുവരെ റഗുലറൈസ്‌ ചെയ്‌തിട്ടില്ല. ''നിലവിലുള്ള 20 ശതമാനം അധ്യാപകര്‍കൂടി 2011-ല്‍ വിരമിക്കും. അധ്യാപകനിയമനം പൂര്‍ത്തിയാക്കാതെ പുതിയ രീതി നടപ്പാക്കില്ലെന്ന്‌ വിദ്യാഭ്യാസമന്ത്രി പ്രിന്‍സിപ്പല്‍സ്‌ കൗണ്‍സിലിന്‌ ഉറപ്പുനല്‍കിയിരുന്നു. ഇത്‌ പാലിക്കാതെയാണിപ്പോള്‍ ക്രെഡിറ്റ്‌ സെമസ്റ്റര്‍രീതിയും ഗ്രേഡിങ്ങും തിടുക്കത്തില്‍ നടപ്പാക്കുന്നത്‌ ''-കെ.പി.സി.ടി.എ. കണ്ണൂര്‍ സര്‍വകലാശാലാ മേഖലാ സെക്രട്ടറി ഡോ. കെ.സജീവ്‌ കുറ്റപ്പെടുത്തി. ആഗസ്‌തില്‍ നിയമിക്കുകയും ഫിബ്രവരിയില്‍ പിരിച്ചുവിടുകയും ചെയ്യുന്ന ഗസ്റ്റ്‌ ലക്‌ചറര്‍മാരെ വെച്ച്‌ ഗ്രേഡിങ്ങും മറ്റും നടത്തുക കടന്നകൈയാവും. സ്വാശ്രയകോളേജുകളിലെ അധ്യാപകരുടെയും പ്രിന്‍സിപ്പല്‍മാരുടെയും യോഗ്യത ഉറപ്പാക്കാനും സംവിധാനമില്ല. അധ്യാപകരുടെ കുറവ്‌ പ്രശ്‌നമാണെന്ന്‌ പ്രൊഫ. കെ.എന്‍. പണിക്കരും സമ്മതിക്കുന്നു. എയ്‌ഡഡ്‌, ഗവ. കോളേജുകളില്‍ ഒഴിവുകള്‍ നിര്‍ണയിക്കുന്നതിനുള്ള അദാലത്തുകള്‍ കഴിഞ്ഞു. നിയമനത്തിന്‌ ഉടന്‍ നടപടിയുണ്ടാവും. പുതിയ രീതി വരുന്നതോടെ സ്വാശ്രയകോളേജുകളും മികച്ച അധ്യാപകരെ നിയമിക്കാന്‍ നിര്‍ബന്ധിതരായിത്തീരും. ഇവരുടെ യോഗ്യത ഉറപ്പാക്കേണ്ടത്‌ സര്‍വകലാശാലകളാണ്‌-അദ്ദേഹം പറഞ്ഞു. കോളേജുകളില്‍ 1998 വരെയുള്ള മുഴുവന്‍ ഒഴിവുകളും നികത്തിയതായും ഗവ. കോളേജുകളിലെ ബാക്കി ഒഴിവുകള്‍ ഉടനടിയും എയ്‌ഡഡ്‌ കോളേജുകളിലേത്‌ സമയബന്ധിതമായും നികത്താന്‍ സര്‍ക്കാര്‍ തീരുമാനിച്ചിട്ടുണ്ടെന്നും മെയ്‌ 11ന്‌ വിദ്യാഭ്യാസമന്ത്രി എം.എ. ബേബി പറഞ്ഞിരുന്നു. എന്നാല്‍, ഇതുവരെ പുതിയ നിയമനമൊന്നും നടന്നിട്ടില്ല. ബിരുദക്ലാസുകളിലെ കുട്ടികളുടെ എണ്ണക്കൂടുതലും നിരന്തരമൂല്യനിര്‍ണയത്തെ ബാധിക്കും. കോമണ്‍ കോഴ്‌സിനുംമറ്റും ഒരു ക്ലാസില്‍ 75 കുട്ടികള്‍ നിരന്നിരിക്കുമ്പോള്‍ ഓരോ കുട്ടിയുടെയും പ്രകടനം വിലയിരുത്തി ഗ്രേഡ്‌ നല്‍കുക അത്ര എളുപ്പമല്ല. ക്ലാസുകളില്‍ കുട്ടികളുടെ എണ്ണം 30 ആയി പരിമിതപ്പെടുത്തണമെന്ന കൗണ്‍സില്‍നിര്‍ദേശം എത്രകണ്ട്‌ പ്രാവര്‍ത്തികമാവുമെന്ന്‌ കണ്ടറിയണം. അതുവരെ പ്രൊജക്ട്‌, സ്‌പോട്ട്‌ ടെസ്റ്റ്‌ തുടങ്ങിയ മൂല്യനിര്‍ണയരീതികള്‍ വേണ്ടിവരും. നിരന്തരമൂല്യനിര്‍ണയത്തില്‍ കുട്ടികളെ ഇരയാക്കാനോ പ്രീണിപ്പിക്കാനോ സാധ്യതയുണ്ടെന്നതാണ്‌ മറ്റൊരു വെല്ലുവിളി. കോളേജുകളിലെയും സര്‍വകലാശാലകളിലെയും ശരാശരി മാര്‍ക്ക്‌ പ്രസിദ്ധീകരിച്ചും പരാതിപരിഹാരമാര്‍ഗങ്ങള്‍ വഴിയും ഇത്‌ മറികടക്കാമെന്ന വിശ്വാസത്തിലാണ്‌ കൗണ്‍സില്‍. ഗ്രെയ്‌സ്‌ ഗ്രേഡും ഗ്രേഡ്‌ കാര്‍ഡും സെമസ്റ്റര്‍ രീതിയും ഗ്രേഡിങ്ങും നടപ്പാക്കുമ്പോള്‍ കലാ-കായികരംഗങ്ങളിലുംമറ്റും മികവുകാട്ടുന്ന വിദ്യാര്‍ഥികള്‍ക്ക്‌ ഗ്രെയ്‌സ്‌ മാര്‍ക്ക്‌ അനുവദിക്കില്ല. പകരം ഗ്രെയ്‌സ്‌ ഗ്രേഡ്‌ അനുവദിക്കും. കുറഞ്ഞ ഗ്രേഡ്‌ ലഭിച്ച കോഴ്‌സിന്‌ ഗ്രെയ്‌സ്‌ ഗ്രേഡ്‌ അനുവദിക്കാന്‍ വിദ്യാര്‍ഥിക്ക്‌ ആവശ്യപ്പെടാം. ഇതുംകൂടി കണക്കാക്കുമ്പോള്‍ വിദ്യാര്‍ഥിക്ക്‌ ആ കോഴ്‌സിന്‌ ഉയര്‍ന്ന ഗ്രേഡ്‌ ലഭിക്കും. ഇപ്പോള്‍ വാര്‍ഷികപരീക്ഷകള്‍ക്ക്‌ നല്‍കുന്ന മാര്‍ക്ക്‌ലിസ്റ്റിനുപകരം സെമസ്റ്റര്‍ അവസാനവും ബിരുദ പ്രോഗ്രാം പൂര്‍ത്തിയാക്കുമ്പോഴും നല്‍കുന്ന ഗ്രേഡ്‌ കാര്‍ഡുകളാണ്‌ മറ്റൊരു പ്രത്യേകത. സര്‍വകലാശാലയുടെ പേര്‌, കോളേജിന്റെ പേര്‌, ബിരുദപ്രോഗ്രാം, വിദ്യാര്‍ഥിയുടെ പേരും രജിസ്റ്റര്‍ നമ്പറും തുടര്‍മൂല്യനിര്‍ണയത്തിലെ കോളേജ്‌ ശരാശരി, സര്‍വകലാശാലാ ശരാശരി തുടങ്ങിയ വിവരങ്ങള്‍ ഉള്‍പ്പെടുത്തിയതാവും ഗ്രേഡ്‌ കാര്‍ഡ്‌. നിലവിലുള്ള മാര്‍ക്ക്‌ലിസ്റ്റില്‍ കോളേജിന്റെ പേരില്ല.
01st July 2009 06:13:18 PM
 
Comments for this news
 
Name: Date:
Comments:
 
 
print Print This Story email Email This Story Write Comment
 
 
Make Us Your home Page Make Us Your Home page! RSS